சட்டத்திற்கு கட்டுப்பட வேண்டும் - எலான் மஸ்க்கிற்கு ரிலையன்ஸ் பதிலடி

இந்தியாவில் தனது ஸ்டார்லிங்க் செயற்கைக்கோள் இணையச் சேவையை அறிமுகப்படுத்த எலான் மஸ்க் தீவிரமாக முயற்சி செய்து வரும் நிலையில், அம்பானியின் ரிலையன்ஸ் ஜியோ நிறுவனம் மறைமுகமாகப் பதிலளிக்கும் வகையில் அறிக்கை வெளியிட்டுள்ளது.

எலான் மஸ்க்கிற்குச் சொந்தமான ஸ்டார்லிங்க் நிறுவனம், செயற்கைக்கோள்கள் மூலம் அதிவேக இணையச் சேவையை வழங்கி வருகிறது. இந்தியாவிலும் இந்தச் சேவையைத் தொடங்க அந்நிறுவனம் முயற்சி செய்து வருகிறது.

இதற்கிடையே, இந்தியாவில் தனது சேவையைத் தொடங்குவதில் தாமதம் ஏற்படுவதற்கு ரிலையன்ஸ் ஜியோ போன்ற நிறுவனங்களின் ஆதிக்கம் காரணமாக இருப்பதாக எலான் மஸ்க் தரப்பில் குற்றச்சாட்டுகள் முன்வைக்கப்பட்டதாகத் தகவல்கள் வெளியாகின.

இதற்கு மத்திய அரசு மறுப்பு தெரிவித்ததுடன், இந்தியர்களின் தரவுப் பாதுகாப்பு மிகவும் முக்கியமானது என்றும், இந்தியாவில் தொழில் தொடங்கவும் சேவைகளை வழங்கவும் விரும்பும் நிறுவனங்கள் நாட்டின் சட்டங்களுக்கு உட்பட்டு செயல்பட வேண்டும் என்றும் வலியுறுத்தியுள்ளது.

இந்த விவகாரத்தில் இதுவரை அமைதி காத்து வந்த ரிலையன்ஸ் ஜியோ நிறுவனம், தற்போது அறிக்கை ஒன்றை வெளியிட்டுள்ளது.

அதில், இந்தியச் சந்தையில் முதலீடுகளையும் புதுமையான தொழில்நுட்பங்களையும் வரவேற்பதாகவும், உள்ளூர் நிறுவனங்கள் மற்றும் வெளிநாட்டு நிறுவனங்கள் என அனைத்துத் தரப்பினருக்கும் சட்டம் சமமானது என்றும் குறிப்பிட்டுள்ளது.

மேலும், 2016-ஆம் ஆண்டு வாடிக்கையாளர்கள் எவருமின்றி சந்தையில் நுழைந்த ஜியோ, பத்து ஆண்டுகளுக்குள் 53 கோடி வாடிக்கையாளர்களின் நம்பிக்கையைப் பெற்றுள்ளதாகவும், உலகிலேயே மிகக் குறைந்த விலையில் தரமான இணையத் தரவு சேவைகளை வழங்கி வருவதாகவும் அந்த அறிக்கையில் தெரிவிக்கப்பட்டுள்ளது.

தொடர்ந்து, ஜியோவின் சொந்த செயற்கைக்கோள் இணையச் சேவைகளுக்கான அனுமதிகளும் இன்னும் நிலுவையில் இருப்பதாக நிறுவனம் சுட்டிக்காட்டியுள்ளது.

செயற்கைக்கோள் இணையச் சேவைத் துறை எந்தவொரு தனிநபருக்கும் சொந்தமானது அல்ல என்றும், இத்துறையில் நிலவும் போட்டியை வரவேற்பதாகவும் தெரிவித்துள்ளது.

அதேவேளை, ஸ்டார்லிங்க் உள்ளிட்ட அனைத்து செயற்கைக்கோள் இணையச் சேவை நிறுவனங்களும் வணிக ரீதியாகச் செயல்பாடுகளைத் தொடங்குவதற்கு முன்பு, உரிய பாதுகாப்பு நெறிமுறைகளையும் சட்ட விதிகளையும் பின்பற்ற வேண்டும் என்றும் ரிலையன்ஸ் ஜியோ வலியுறுத்தியுள்ளது.

இந்த அறிக்கையின் மூலம், இந்தியாவில் செயற்கைக்கோள் இணையச் சேவையைத் தொடங்குவதற்கான அனுமதி விவகாரத்தில் தனது நிலைப்பாட்டை ஜியோ தெளிவுபடுத்தியுள்ளதாகக் கருதப்படுகிறது.

ஸ்டார்லிங்க் மற்றும் இந்தியத் தொலைத்தொடர்பு நிறுவனங்களுக்கு இடையிலான போட்டி அடுத்தகட்டமாக எவ்வாறு நகரும் என்பது கவனத்தைப் பெற்றுள்ளது.