ஜனாதிபதிக்கு மகாநாயக்க தேரர்கள் கடிதம் - 22 ஆவது திருத்தம் மீதான எதிர்ப்பு தீவிரம்

இலங்கை

உயர்நீதிமன்ற மற்றும் மேல்முறையீட்டு நீதிமன்ற நீதிபதிகளின் ஓய்வுபெறும் வயதை நீட்டிக்கும் நோக்கில் முன்மொழியப்பட்டுள்ள அரசியலமைப்பின் 22 ஆவது திருத்தத்தை முன்னெடுக்க வேண்டாம் என வலியுறுத்தி, மூன்று பௌத்த பீடங்களின் தேரர்கள் ஜனாதிபதி அனுர குமார திஸாநாயக்கவுக்கு கடிதம் அனுப்பியுள்ளமை வெளிச்சத்துக்கு வந்துள்ளது.

இந்தக் கடிதத்தின் பிரதியை தாம் பெற்றுள்ளதாக தெரிவித்து, ஐக்கிய மக்கள் சக்தி (SJB) நாடாளுமன்ற உறுப்பினர் சுஜீவ சேனசிங்க இன்று (12) நடைபெற்ற ஊடக சந்திப்பில் அதனை பகிரங்கப்படுத்தினார்.

கடிதத்தில், தற்போதைய அரசியலமைப்பின் படி மேல்முறையீட்டு நீதிமன்ற நீதிபதிகளின் ஓய்வுவயது 63 ஆகவும், உச்ச நீதிமன்ற நீதிபதிகளின் ஓய்வுவயது 65 ஆகவும் நிர்ணயிக்கப்பட்டுள்ளதாக மகாநாயக்கர்கள் சுட்டிக்காட்டியுள்ளனர்.

அந்த வயது வரம்புகளை அதிகரிக்கும் வகையில் அரசு நடவடிக்கை எடுப்பது பொருத்தமானதல்ல என தாங்கள் கருதுவதாகவும் கடிதத்தில் குறிப்பிடப்பட்டுள்ளதாக சுஜீவ சேனசிங்க தெரிவித்தார்.

இதற்கிடையில், குறித்த கடிதம் ஜனாதிபதிக்கு அனுப்பப்பட்டதைத் தொடர்ந்து, அமைச்சரவைப் பேச்சாளரும் அமைச்சருமான நளிந்த ஜயதிஸ்ஸ மற்றும் நீதி அமைச்சர் ஹர்ஷண நாணயக்கார ஆகியோர் மகாநாயக்கர்களை சந்தித்து அரசின் நீதித்துறை சீர்திருத்தத் திட்டங்களை விளக்கினர்.

அஸ்கிரிய, மல்வத்து மற்றும் ராமஞ்ஞா பீடங்களின் மகாநாயக்கர்களுடன் இணைந்து கலந்துரையாடிய பின்னர், அமரபுர நிகாயவின் மகாநாயக்கருடனும் தனியாக பேச்சுவார்த்தை நடத்தப்பட்டதாக நளிந்த ஜயதிஸ்ஸ தெரிவித்தார்.

நீதிமன்ற வழக்குகளின் தேக்கநிலையை குறைத்தல், நீதிமன்ற நடவடிக்கைகளை விரைவுபடுத்தல் மற்றும் நீதித்துறையின் செயல்திறனை மேம்படுத்தல் ஆகியவற்றை நோக்கமாகக் கொண்ட விரிவான நீதித்துறை சீர்திருத்தத் திட்டத்தின் ஒரு பகுதியாகவே ஓய்வுவயது நீட்டிப்பு முன்மொழியப்பட்டுள்ளதாக அரசாங்கம் மகாநாயக்கர்களிடம் விளக்கியதாக அவர் கூறினார்.

நீதித்துறைக்குட்பட்ட நிறுவனங்களை வலுப்படுத்துதல், காலிப்பணியிடங்களை நிரப்புதல், நீதிமன்ற அமர்வுகளை அதிகரித்தல், புதிய நீதிமன்றங்களை நிறுவுதல், டிஜிட்டல் மயமாக்கல், தாமதங்களுக்கு காரணமான சட்டங்களை திருத்துதல் மற்றும் நீதிபதிகளுக்கான வசதிகளை மேம்படுத்துதல் போன்ற நடவடிக்கைகளும் சீர்திருத்தங்களில் உள்ளடக்கப்பட்டுள்ளதாக அவர் குறிப்பிட்டார்.

மேலும், ஓய்வுவயது நீட்டிப்பு எந்தவொரு தனிநபரையும் இலக்காகக் கொண்டு முன்வைக்கப்படவில்லை என்றும், நீதிவான்கள் முதல் உச்ச நீதிமன்ற நீதிபதிகள் வரை சுமார் 400 நீதிபதிகளுக்கு இது பொருந்தும் என்றும் நளிந்த ஜயதிஸ்ஸ தெரிவித்தார்.

அரசின் விளக்கங்களை மகாநாயக்கர்கள் கவனமாகக் கேட்டதுடன், நீதித்துறையின் தாமதங்களை குறைத்து மக்களுக்கு நன்மை பயக்கும் சீர்திருத்தங்கள் அமுல்படுத்தப்படுமாயின் தமது ஆதரவை வழங்கத் தயாராக இருப்பதாக தெரிவித்ததாகவும் அவர் கூறினார்.

எனினும், சுஜீவ சேனசிங்க வெளியிட்டுள்ள கடிதம், அரசின் விளக்கக் கூட்டங்களுக்கு முன்னரே உயர்நீதிமன்ற நீதிபதிகளின் ஓய்வுவயதை அதிகரிக்கும் முன்மொழிவு பொருத்தமற்றது என்ற தங்களது நிலைப்பாட்டை மகாநாயக்கர்கள் ஜனாதிபதிக்கு எழுத்துமூலம் அறிவித்திருந்ததை உறுதிப்படுத்துகிறது.