சிறையிலிருந்து தப்பிய 700-க்கும் மேற்பட்டோர் இன்னும் மாயம்

இலங்கை

தேசிய கணக்காய்வு அலுவலகம் வெளியிட்டுள்ள அண்மைய அறிக்கையின்படி, தங்கள் தண்டனைக் காலத்தை நிறைவு செய்வதற்கு முன்பாகவே சிறையிலிருந்து தப்பிச் சென்ற 709 கைதிகள் இதுவரை மீண்டும் கைது செய்யப்படவில்லை.

சிறைச்சாலைகள் திணைக்களத்தின் 2025 ஆம் ஆண்டிற்கான அறிக்கையில் இடம்பெற்றுள்ள இந்தத் தணிக்கை அறிக்கை, நாட்டின் சிறைச்சாலை அமைப்பில் நிலவும் பல்வேறு முறைகேடுகள் மற்றும் சட்டவிரோதச் செயல்பாடுகளை வெளிப்படுத்தியுள்ளது.

அந்த அறிக்கையின்படி, கடந்த ஆறு ஆண்டுகளில் மொத்தம் 1,181 கைதிகள் தங்கள் தண்டனைக் காலத்தை நிறைவு செய்வதற்கு முன்பாகவே சிறையிலிருந்தோ அல்லது சிறைக்காவலிலிருந்தோ தப்பிச் சென்றுள்ளனர்.

இவர்களில் 709 பேர் இதுவரை மீண்டும் கைது செய்யப்படவில்லை. 

சிறையிலிருந்து தப்பிச் சென்ற கைதிகளை மீண்டும் பிடிக்காமல் அவர்கள் சுதந்திரமாக இருக்க அனுமதிப்பது பொதுப் பாதுகாப்பிற்கு அச்சுறுத்தலாக அமையக்கூடும் என்று தேசிய கணக்காய்வு அலுவலகத்தின் அறிக்கை எச்சரித்துள்ளது.

இதற்கிடையில், 2025-ஆம் ஆண்டில் 22 சிறைச்சாலைகளுக்குள் இருந்து 5,083 கைபேசிகள் கைப்பற்றப்பட்டதாக அதிகாரிகள் கண்டறிந்துள்ளதாக அந்த அறிக்கை தெரிவிக்கிறது.

மேலும் குறித்த ஆண்டில் சிறைச்சாலை அதிகாரிகளால் 2,432 கைபேசி மின்கலங்கள் , 970 மின்னேற்றிகள், 4,149 சிம் அட்டைகள் மற்றும் 3,111 பிற உபகரணங்கள் கைப்பற்றப்பட்டுள்ளன.